ایسته سن

وه، نه گؤیچک یازیلیب صفحۀ روخسانه بو خط!
گؤرسه، بیللاه، گتیرر کافری ایقراره بو خط.

ایسته سن، حاضر ائدر هر کیمی اول ساعتده،
دئیه سن نقش اولونوب منطر احزاره بو خط.

ائله بیل قؤوس قوزح دیر چکیلیب چرخ اوزره،
گؤر نه رنگین یاراشیر عارض گولناره بو خط!

آللاه، آللاه، یئری تحسین ائله اول نقاشه،
یوخدو ایمکانی گله گردیش پرکاره بو خط.

سهردیر بو گؤره سن، یوخسا کی، مانی ایشیدیر،
چوخلارین ائیلیه جک من کیمی آواره بو خط.

نقطۀ خال سیاهین منی گیردابه سالیب،
نه اولور دردیمه بیرده ائده بیر چاره بو خط؟

داغ ووروب لاله کیمی باغریما خوش دور، آمما
چوخ فقیرین گونونو ائیله یه جک قاره بو خط.

ایۀ نباتی، نه قدر وار ایسه عؤمرون، خط یاز،
عاقبت بیر گون اولور کیم، گلی بیر کاره بو خط.

No Comments

Post a Comment