بیوفاده نه محبت، نه دیانت، نه وفا؟!

عنبرین بویو اگر دولموش او گیسولرده،
بئله خوش بوی دخی اولماز او خوشبولرده.
گر دئیم مشک، او، آهوی ختنده تاپیلور،
ائتمیشم بلکه خطا، یوخ او ایی آهولرده.
تربییه ائتمیش اونو، بلکه، ملک، یا کی، پری،
وار گمان: گؤزده اولور چونکی او جادولر ده.
زلف مشکینین آلیبدور روخون حاله صفت،
بئله بیر حالت اولور جمله او مهرولرده.
بند اولوب زلفه دخی قاش و گؤز ایله خاله،
بیلمزم اوندادیمی کؤنلو و یا بولرده؟!
گؤزومو کسمنم اول گؤزدن اؤلونجه، بلکه،
دیل گمگشته نی چون تاپدیم او یارغولرده.
بیوفاده نه محبت، نه دیانت، نه وفا؟!
ای کمینه، تاپیلور بلکه ده دلجولرده.

No Comments

Post a Comment