کؤنلومو

ای بیوفا، گتیرمه چوخ افغانه کؤنلومو،
یاندیرما بونجا آتش هیجرانه کؤنلومو!

بیردم گؤتور او مه کیمی روخساردن نقاب،
ای سنگ دیل، یئتیرمه بئله جانه کؤنلومو!

بیر جورعه مئیدن اؤترو منی ائتمه دیل کباب،
دؤندرمه، ساقی جان، بو قدر قانه کؤنلومو!

قیل لؤوحی سینه می هدف ناوک بلا،
بیر شاد قیل بلالره همخانه کؤنلومو!

وئر باده، مست قیل، سال اؤزون خم ایاغینا،
دشت جنونه سالما بو دیوانه کؤنلومو!

ای دیلبر ستمگر و، وئی یار تند خو،
سالدین عجب چاه زنخدانه کؤنلومو!

دؤور روخونده حلقه ووران زولف خم به خم،
اولدور چکن کمند ایله زیندانه کؤنلومو.

رحم ائیله بیر بو گؤزدن آخان قانلی یاشیما،
بیر ائت نشان او ناوک موژگانه کؤنلومو!

بو مرغ دیل کی، دانۀ خالین اسیری دیر،
قالمیش یووا او زولف پریشانه کؤنلومو.

جلاد گؤزلرین سوساییب یاخشی قانیما،
ایستر کی، غمزه دن ائده ویرانه کؤنلومو!

بیلمم منه نه سحر اوخودو مست گؤزلرین،
مجنون کیمی توتوشدو بیابانه، کؤنلومو.

صنعانه یار قیلدی منی زولف پرخمین،
نقش عذارین ائتدی صنم خانه کؤنلومو.

حئیران اولان جمالینا گولدن نه کام آلیر،
بیجا آپارما سئیر گولوستانه کؤنلومو!

بیر گول عذاره عاشیق اولوب، سالمیشام عجب
پروانه تک بیر آتش سوزانه کؤنلومو.

هیجرین آخیتدی بس کی، گؤزومدن سرشگ – آل،
قورخوم بودور کی، غرق ائده توفانه کؤنلومو.

ایش بیتمز اولدو زهد و ریادن، نباتیا،
جام طرب دن ائیلمه بیگانه کؤنلومو

No Comments

Post a Comment