یوخدو، یوخ!

سنسیز، ای گول، کؤنلومون بیر دم قراری یوخدو، یوخ!
سندن اؤزگه نئیله سین، بیر غمگساری یوخدو، یوخ!

درد هیجرین چاره سین هرچند بیلدیم صبر ایمیش،
نئیلییم، بیللاه، بو دریانین کناری یوخدو، یوخ!

لیلی! لیلی! – سؤیله ییب چوخلار دئییر کیم، عاشیقم،
لئیک مجنون تک اونون بیر داغداری یوخدو، یوخ!

هر خزانین بیر باهاری اونسوز اولماز، اولماسین،
بو چؤل اولموش گولستانین بیر باهاری یوخدو، یوخ!

گوللری، بولبوللری، آب و هاواسی چوخ گؤزل،
حیف کیم، بو گولشنین بیر گول عذاری یوخدو، یوخ!

هیچ عیبین یوخ، گؤزللیک هامی سنده جمع دیر،
نئیلییم اما کی، عهدین اعتباری یوخدو، یوخ!

سن نه بسلرسن بو ترلانی، نباتی، روز و شب؟
من بو داغی چوخ دولاندیم، بیر شکاری یوخدو، یوخ

No Comments

Post a Comment