ای روح روانیم.

ای سونبول تردن اوزونه پرده توتانیم،
ای غنچه دهانیم.
پروانه کیمی باشینا قوی بیرجه دولانیم،
ای روح روانیم.
ائتدین بو قدر جؤور و جفا بو نئچه ایلده،
هئچ بیرجه دئدیم اوف؟
ایندی دخی، بیللاه، اوزولوب تاب و توانیم،
قالمیب دخی جانیم!
یاندیرما منی آتشی هیجرانه، یازیقسان،
آهیم سنی اودلار!
سنسیز گئجه لر عرشه چیخیب آه و فغانیم،
ای قاشی کامانیم.
گؤرگج منی بیر توند کئچیب، بیر گئری باخسان،
اولام گئنه مجنون.
وحشی کیمی کوهی اولورام، بودو گومانیم،
آرتار گئنه شانیم.
بیلسم کی، یقین وئرمه میسن کام رقیبی،
دوررام، ایتین اوللام،
آلما گؤرورم وئرمیسن، آرتیق نه اینانیم؟
قانیم کی، اینانیم.
عهدیم بو ایدی درد دیلیم ائیلدیم اظهار
هر وقت سنی گؤرسم.
چونکی سنی گؤردوم، قورودو، قالمادی قانیم،
لال اولدو زبانیم.
فیکریم بودو کیم، ائیله یه سن بیر اوخا قوربان
بو عاشیق زاری.
یئردن یئره چیرپیم اؤزومو، خاکه بولانیم،
آل قانه بویانیم.
تؤکدون پر و بالیمی منیم، ایندی قووورسان،
اینصافینا قوربان.
قوی کونج قفسده منی بیر راحت اوزانیم،
اؤز حالیما یانیم.
ریندان خراباته نه لازیم ائدم اظهار،
من دردیمی، یارب!
معلومدور اونلاره بوتون سود و زیانیم،
هر راز نیهانیم.
دردی دئمک آساندیر، اگر اولسا ارسطو،
لوقمان و فلاتون.
ایندی کی، اولار یوخ، بیر اوتان، کسمه آمانیم،
ای اشک روانیم.
لوقمان و فلاتون و ارسطو ائده بیلمز
بو درده موداوا.
آزدیردی منی بو قلم میشک فیشانیم،
دؤندردی اینانیم.
ائتسه ائده جک سرور کل صاحب دولدول،
اولدوم گئنه بولبول.
گلدیکجه نفس مدح ائله سم، واردی بیانیم،
آچیقدی لیسانیم.
قورتار منی بو محنت و غم، درد و المدن،
ای میر حدایت!
بیر گوشۀ چشم ائت منه، ای شاه جهانیم،
ای عرش ومکانیم،
صرف ائتدی ره عشقه تمام عمرو نباتی
بو دار فناده.
بیر یول دئمه دی، ای جانی داش، حیفدی جانیم،
گل-گل بیر اوسانیم!

این نوشته در سیّد ابوالقاسم نباتی - مستزاد ارسال شده است. افزودن پیوند یکتا به علاقه‌مندی‌ها.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *