ای دوختر ترسا!

ای غنچه دهان، سیم بدن، دیلبر طناز،
ای سرو سرفراز!
اؤلدوم دخی، قوربانین اولوم، رحم ائله بیر آز،
بسدیر بو قدر ناز.
یاندیم، کوله دؤندوم، یاناسان سن ده منیم تک،
ای دوختر ترسا!
او ناکس ایله اولما دخی همدم و هم راز،
والله بئله اولماز.
آدم کیمی چوخداندی اولوب ویرد زبانیم،
“یا رب زلمنا”.
اما کی، نه حاصل او جفاپیشه اینانماز،
بیر دم منه باخماز…
سن بؤیله بیلیردین کی، اؤزون عاشیق اولوبسان،
کول باشینا اولسون!
دور، پوفله اوجاغی، بو اودون یاشدیر، آلیشماز،
اؤزباشینا یانماز،
مین داغی اگر بیر نفه سه جانیما قویسا،
بیر “اوف” دئمرم من.
اما اونو گؤر، بیرجه منی یادینا سالماز،
بیر بوسه یه قییماز.
قالدی دخی چون محشره بو حسرت دیدار،
ای یار وفادار،
باری، هر ایکی ایلده سوروش حالیمی آز- ماز،
یا بیرجه کاغیذ یاز.
طوطی کیمی فریاد ائلرم خسته و رنجور،
بو کنج قفسده.
بیر پسته ایله کیمسه منی یادینا سالماز،
بیر کؤنلومو آلماز،
ای بولبول بیچاره، فغان ائتمه دمادم،
صبر ائیله، توت آرام.
دایم کی، قیش اولماز، همیشه بئله قالماز،
البته، گلر یاز.
آزدیرما منی، سئیر گولوستانا آپارما،
ای همدم جانی.
یوز فصل باهار اولسا، منیم کؤنلوم آچیلماز،
بو کئفدن آییلماز.
یاریم گئنه مندن کوسوبن آجیق ائدیبدیر،
اوخ، اوخ، آمان آللاه!
بیلمم نه قیلیم، چاره ندیر، بیر اوزون آچماز،
بیر کلمه دانیشماز!
کؤنلوم ائوینی لشکر غم ائیله دی ویران،
ساقی، سنه قوربان!
دور، وئر کی، بو سیسقا بیر- ایکی جام ایله دویماز،
تا دوشمه سه قانماز.
سال غولغوله بو گنبده افلاکه، خوروش ائت،
ای دف زن چاپوک.
مطرب، دخی سن شدد ائله بیر نغمۀ شاهناز،
ای مرغ خوش آواز!
هر نه دئیه جکسن، دئگینن، جانیما خوشدور،
ای زاهید بدکیش!
دریایه داش آت، یا قایا سال، ذره جه داشماز،
هرگیز کی، بولشماز.
باخما کی، بئله عاجی زو میسکیندی نباتی،
ای هئی، حذر اوندان!
مؤولا بیلی یو خدور اؤزو تک ریند و نظرباز،
عیار چپ انداز.

این نوشته در سیّد ابوالقاسم نباتی - مستزاد ارسال شده است. افزودن پیوند یکتا به علاقه‌مندی‌ها.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *