وئر بیرجه پیاله

ساقی، توت الیم کیم، یئته سن عمر کماله،
وئر بیرجه پیاله.
دوشدوم گئنه غواص کیمی بحر خیاله،
گیرداب ملاله.
کؤنلوم قوشو پروازه گلیب، دؤوره چیخیبدیر،
قالخیبدی هوایه.
آیا گؤره سن هاردا شیکار ائیله یه، قاله،
یا کیم تورا ساله؟
دؤور ائیله، قاناد چال، نظر ائت، ائیله تاماشا،
یا بچۀ عنقا!
شاید نظرین اوغرایا بیر طورفه غزاله،
بیر حور مثاله.
گئتدی، دخی فریاد ائلمه، هویلاما، گلمز،
وحشیدی بو شاهباز.
دوشدو گؤره سن هانسی داغا، اوچدو نه داله،
یا قوندو نه لاله؟
بیلمم نه قیلیم، چاره ندیر، قالمیشام عاجیز،
موشکول ایشه دوشدوم.
هوشوم داغیلیب، عقل معطل دی بو حاله،
دوشدوم عجب آله.
چوخ جؤور ائلمه، تؤکمه گؤزون یاشینی هر دم،
ای مرغ سحرخیز،
دور کی، دوگون آچیلدی، برات اولدو حواله،
گلدی وئجه ناله.
تؤکدو چیچه یین، وئردی ثمر نخل اومیدین،
سبز اولدو مرادین.
عقد ائتدی ملکلر سنی اول قورص هیلاله،
مهر اولدو قباله.
بو نعمت عظما سنه گر اولسا میسر،
ای عاشیق مجنون!
عهد ائیله، قوناق ائیله منی بیر کاسا باله،
یا بیرجه پیاله.
ساقی، منه بیر جام ده وئر، دؤورو تامام ائت،
دور، قیلما تعلل.
صبح اولدو، گول اوزره ساچیلیب قطرۀ ژاله،
گلمکده دی لاله.
دیوانه کؤنول، غم یئمه بوندان بئله بیر ده،
حمد ائیله خدایه.
المنت لیلله کی، رقیب اولدو ایزاله،
جفت اولدو شغاله.
یاتما، دور اویان، آچ گؤزونو، ائتمه شکرخواب،
ای بولبول سرمست.
تورپاغه دؤشن، عرضینی قیل باد شیماله،
اول مشک-خیصاله.
سینه مده گئنه شعله چکیب نار محبت،
ایستر منی یاخسین.
حسرتدی یانیق تشنه کیمی آب زواله،
مایلدی وصاله.
یارب، گؤره سن لؤوحه یازیب کاتیب قدرت،
کیم، وصله یئتم من؟
البته کی، قادیردی خدا کل فعاله،
هر امر محاله.
ال چکمه، نباتی، نه قدر وار ایسه جانین،
مؤولا اتیین دن،
سال عالمی گؤزدن، یاپیش اول بحر جلاله،
طی اولدو مقاله.

این نوشته در سیّد ابوالقاسم نباتی - مستزاد ارسال شده است. افزودن پیوند یکتا به علاقه‌مندی‌ها.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *