بیر دیلبر عیار

ائتدی منی غم تاپداغی بیر گؤزلری خوممار،
بیر دیلبر عیار.
ساقی، منه وئر لطف ایله بیر ساغر سرشار،
غمدن منی قورتار.
یوخ غایتی تقریر ائله سم مین گئجه – گوندوز
شرح غمی عشقی.
پایانه یئتیشمز، نه قیلیم درد دیل اظهار،
مین گیزلی سؤزوم وار.
ائتمون منی مجنونه برابر، سیزی تاری،
ای اهل خرابات!
گؤردو نئچه یول یارینی اول عاشیق جرار،
اول ساکین کوهسار.
آللاه بیلیر، من کیمی بیر عاشیق محروم
دونیاده تاپیلماز.
شاهیددی بو احواله ایکی دیدۀ خونبار،
هم آه شرر بار.
همدم دیلرم چاره اجلدن غم هیجره
گلمز کی، نه حاصل.
قالدیم بئله بیر درد ایله بی مونیس و غمخوار،
بی عار و مددکار.
ای عشقه دوشن عاشیق بیچاره، یقین بیل
کیم، داده یئتن یوخ!
من ائیه مدیم، دوغروسو، آللاهیما ایقرار
خو شدور منه زونار.
مسدود اولوب چار طرفدن منه، یاران.
ابواب فتوحات.
گویا کسیلیبدیر منه بیر محرم اسرار
بیر یار وفادار.
افسون و فسونون اثری اولمادی هرگیز
اول طورفه نگاره.
آسان ایشیمی ویردو دعا ائیله دی دیشوار،
قالدیم بئله ناچار.
نه عقلده کام اولدو میسر، نه جونون دا،
ای عارف سالیک.
سن مندن ائشیت، بیر گوله اول طالب دیدار،
ایلش بئله بیکار.
فاش ائتمگینن سرّینی هر جاهل خامه،
اول عاشیق کامیل.
سن اولاماگینن من کیمی هیجرانه گیریفتار.
مهجور و دیل فکار.
هیجران دئمیش اولدوم، قلم اود توتدو آلیشدی
آهیم شرریندن.
بیر خنجر خون ریز گتیر، باغریمی بیر یار،
بیر گؤرکی، نه لر وار!
زهر ائیله دیلر بو ایکی گون دیرلیگی، بیللاه،
من عاجیز زاره!
گؤر ائتدی منی جؤور ایله بو چرخ سیتمکار،
جاندان نئجه بیزار!
چوخ ائتمه شیکایت سیتم چرخدن، ای دیل،
خوش شیوه دئییل بو.
ایسترسن اگر گؤرمه یه سن طعنۀ اغیار،
آه ائیلمه زینهار!
اول سنگ- دیلین باشینه چوخ دؤنمه، نباتی،
والله کی، یانارسان!
تؤک قانلی سیریشکین، دئگینن صیدق ایله تکرار
یا حیدر کررار!

این نوشته در سیّد ابوالقاسم نباتی - مستزاد ارسال شده است. افزودن پیوند یکتا به علاقه‌مندی‌ها.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *