میثل قمر

منبع چشمۀ هر کلمه کی، جاری اولا بیر نیطق- بیان یا کی، لیسا ندان آدیدیر او
بیزیم آللاه عظیمین کی، اونون مرحمتی، لوطفو اوزوندن یارانیب نؤوع بشر، عقل و
هنر، قوت و ایدراک، اوزونده ایکی گؤز، هم ایکی قاش، اوز نئجه اوز، میثل قمر، قامتی
بیر سرو، بئلی توک کیمی بیر اینجه کمر، باش کاساسی عقل، بسیرت یئری، هوش مرکزی، اوندا
ائشیدیب دویماغا بیر جوت ده قولاق، سونرا دوداق، لب نئجه لب، لعل بدخشان، خطی ده
عنبر ریحان، چکیلیبدیر ایکی صف کیپریگی بیر گوجلو قوشون تک گؤزون اطرافینی حیفط
ائتمه یه، بیر پسته کیمی غنچۀ خندان بیر آغیز کی، نه دئییم وصفینی، گؤوهر کیمی
دیشلر دوزولوب هر بیری بیر لعل ایله مرجان، هله او گردنه بیر باخ، اول بیلمز اونا
تای، هئچ ده سوراحی، نه ده مینا، او بویو، قامتی رعنا، تؤکولوب چینینه گیسولری
زنجیر کیمی، سونبول کیمی، به- به، بئله بیر عطر، طراوت و نزاکتله قرا رنگی او
یلدا گئجه سیندن ده گؤزلدیر، دئیک احسن ائله بیر خالیقه کی، خلق ائله ییبدیر اونو،
هم ده نه گؤرورسن بو جاهاندا تک اونو صنعتینین، قدرتینین حاصیلیدیر، بیر بو
قدر لؤلؤ و یاقوت یمن، لعل بدخشان، بوتون چؤل و بیابان و عمان
یئتیریب بسله یه هر گؤوهر رخشان، هامیسی، لؤلؤ شهوار اونوندور، نظر ائت
حیکمته، اسراره، یئری، مسکنی یوخدورسا دا، امریله دؤنور چرخ فلک، نور ساچیر آی
و گونش، گؤیدکی هر بورجو قمر، گاه ایتی، گاه یاواش، گاه سویوق، گاه دا کی ایستی،
گئجه – گوندوز دولانیر، گاه سؤنور، گاه دا یانیر، خلق ائدنی بیرجه او آللاه کی، ائله آللاه
خلق ائتدی ایکی عالمی، دونیانی، نه وار، جین و بشر آدم و حوانی و یا روح الامین
جبرا یلی، بیر ده میکا یلی، او موسی ایله عیسی نی کرم ائتدی مسیحایا، نفس وئردی دیریلتسین،
اؤلونو، دیگرینه وئردی تجلل کی، اونون نورو ایله درک اولاق مؤعجوز سعبان. اوجا
گونبد اعلاو سماوات و هیجابات و مقاماتو کرامت و لاهوت و ناسوت کی، بوردا
هامیسی اولدولا مبهوت، گلن لر هامیسی جینن و پری، آدم و انسان، بوتون گبرو
موسلمان، بوتون حوری و قیلمان غلط دیر، نه دئییم، کاش اولایدی منه بیر
محرم اسرار، آچایدیم اونا اؤز سیرریمی، آنجاق کی، بو سیرری بیرینه سؤیلمه ییب ساخلیا
پنهان، ایکیمیز الده قدح، قارشیدا بیر ساغر صهبا، ائله ییب عئیش ایله عیشرت، نئجه عیشرت
کی، ائدیب رقص بیلیدیک بئله دیر عالم فانی، نه ائدیم سؤیلمک اولمور، بو کیمی سیرری نه
جور شرح ائلییم، یا کی ائدیم من اونا مین شوکر، غطا سایه سی هر یئرده دوشور با شلارا، سن
قدرته باخ کی، قارا تورپاقدا نئجه
نعمتی الوان گتیریب ظاهره، چا یلار و آغاجلار و بولاق لار نئجه داغلار، نئجه باغلار،
نئجه لذتلی و دادلی و شیرین مئیوه و مئیوه! نه دئییم من نئجه سونبول، نئجه
گوللر، نه چمن لر، بو چمنده نئجه قومری، نئجه بولبول، نئجه جه-جه، نئجه سسلر
کی، اولور هر ائشیدن مست، گلیر ناله و افغانه یا دا واله اولوب ترک ائدیر احوالی، گئدیر
عشق چمنزارینه سئیر ائتمه یه بیر باشقا جاهانی، گل اونو دورما، کؤنول، جاهیل اولوب
ترک ائلمه، سن بئله بیر باغ گولوستانه نظر سال، نئجه گؤر شاخه ده قوش لار اوتوروب
اولدو غزلخوان، بئله حالت، بئله بیر یاز بیزیم عالمده دی، هئچ یئرده تاپیلماز، چالیشیب
بادۀ ریحانی یئره قویما بو شرط ایله کی، بیر یار مووافیق تاپیب اؤز حالینه، بیرلیکده
چکیل گوشه یه، گوللر آراسیندا کئچیر اؤز عؤمرونو آزاده، مبادا یاراماز شخص ایله
یولداش اولاسان کی، ایچه او بادنی آخیرده قیرا داشلا سنین جامینی، بیل ها! نه ائدیم، سن
منی عفو ائت کی، چیخیب ریشته سی الدن سؤزومون کئچدی حدودی، ائله کی، گولشنه گلدین،
گؤزونو آچ، آییق اول، ائیله نظر، گؤرکی، نئجه هر آغاجین یارپاغی گلمیش دیله، سؤیلر
اؤزونون سیررینی صبحون یئلینه بلکه ترحوم ائده بیر آن، آپارا عرض ائده دیلدارینه، عیجز ایله دئیه، ای بوت خونخوار، جفاکار و دیل آزار، خزان لار بیزی اینجیتدی، فقط وصلین اومیدیله گلیب گؤرمه یه بیر قورخولو وادیده دوروب منتظرلیک هر بیریمیز. بلکه ده قسمت اولا دیدار، بیزه رحم ائله، ای کاش، نه اولسون کی، گرک بیر دفعه بیر آن سنی، بیرجه سوروش حالیمیزی، دردیمیزی، لطف ایله درمان ائله، تا اینکی یئتیشدی بورا سؤز قادیر یئکتانی باجاردیقدا بیر آز مدح ائله دیک، نؤوبه چاتیب ایندی بؤیوک اوغلو او آدم بابانین هانسی کی، خیلقت تک اونون خاطرینه خلق اولونوب تاپدی بو جور رؤونق و زینت. او، نسبده هامیدان عالی اونون شانی، جلالی، کرمی تعریفه سیغماز، نه دئییم من کی، نئجه علم و هنر دفترینین متلعی اولموش اونون او پاک آدی، اولمازدی بو عالم او اگر عالمه قویمازدی قدم، بیل و یقین ائت نه جمادات، نه نباتات، نه بو عرش و سماوات، نه فیردؤوس، نه جنت، نه جهنم، نه خرابات، نه موناجات، نه ده لؤوح و قلم و کورسی و افلاک و کواکیب، بو آی – اولدوز، گئجه گوندوز، نه بو گونلر، نه بو آیلار، نه بو ایللر، نه پاییزلار، نه ده یازلار – هامیسی تکجه اونون خاطرینه خلق اولونوب گلدی ووجوده، او گؤزل مهر نبوت، بوتون اوممت، هامییا ائتدی سخاوت، اودور، اوتکجه اگر گلسه قیامت، هامییا رحم ائله ییب، قورتارا مین درد و عذابدان، آدیدیر احمد محمود ابولقاسیم، او خئیرول- بشر و سیّد گؤونئین محمد دیر، علی نین عمی سی اوغلو، علی هانسی علی، حیدر صفدر، او علی دی کی، دایانمیش
قاپ یسیندا اونا قنبر ده قول اولدو، نه دئییم من هله سلمان ابولموجی نو میقداد و ابوذر باش ایر، حؤرمت ائدر
تورک و اجم شاه ختا و خوتن و هیند ایله چین حاکمی بونلارلا برابر، بیلیریک بیر ده او قیصر و بوخارا، بوتون عالم بو نباتی ائلییر وصف سنین تک بیر… ائی مه انور، نئجه تعریف قیلیم، یوخدو شبیهین بو لطافت، بو شرافت، بو جاهان اوزره پری حور ی لر اولماز، نه دئییم، قالمیشام عاجیز بو وجاهت، بو ملاحتده زولیخا
ندی، لئیلی ندی، عذرا ندی، سلما ندی، بیللاه کی، اوزون تک اولا بیلمز گول حمرا، هابئله یوخدو قدین تک چمن دهرده بیر سرو دیل آرا و نه شومشاد و نه ارار، نه سنوبر، هانی زولفون کیمی سونبول، اوزونو کیم گوله اوخشاتدی خطا ائتدی، غلط دیر، هانی بو رنگده گول بس نه دئییم ائیله لبی مول، عارضی گون یا مه تابان دیلیم یوخ، دئیه بیلمم لبینه لعل بدخشان، دیشینه گؤوهر رخشان، نه عجب وقتده، نه ساعتده سنی خلق ائله ییب قادیر منان، هانی چشم خومارین کیمی بیر نرگیز شهلا، نه اولور، ای بوت طناز، خوش آواز کی، گهگاه بو بیچارۀ دیل خسته یه بیر رحم ائده سن، یوخسا مگر بیلمه میسن کیم، سنه من عاشیقم، ای یار جفاکار، دیل آزار، سیتم- پیشه و
بی رحم و مروت، نه خوشوندور کی، چکیم من بئله ذلت، سنی تاری، دخی ال چک بو جفادن کی، گومانیم بودو بو وضع ده گر گؤرسه منی رحم ائله یه گبرو نسارا، بئله گلدی بئله گئتدی، بئله باخدی، نئجه باخدی کی، گؤز آخدی، جانیمی اودلارا یاخدی، یئری گئت، دنگ ائلمه، بیر ائله گؤز تا کی، دئییم من بئله گلدی، بئله باخدی، نه بیلیم کیم دئیه جکلر کی، بو افسانه دی کیم، اول بئله گلدی ، بئله گئتدی، او نه مجنون دو، نه
لئیلی و نه مخفی دی، نه پئیداو نه وامیق دی، نه عذرا، نه نباتیدی، نه حافیظ او، مودبیردی کی، تدبیر ائله دی، ائتدی منی عاشیقی شیدا.

این نوشته در سیّد ابوالقاسم نباتی -بحر طویل ارسال شده است. افزودن پیوند یکتا به علاقه‌مندی‌ها.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *