بهشتی اونلارا وئردیم یاخامدان ال گوتورسونلر

کؤنول من عاشیق حریتم چوخ افتخاریم وار،
منیم آزاده لیك تك قلبیدن ایستكلی یاریم وار.

منه گؤسترمه دونیاده گؤزو شهلا گوزل لرده ن،
گؤزه ل زحمتكش ائل لردن گول اوزلو چوخ نیگاریم وار.

گئدیب زاهدلره سؤیله منه چوخ ائتمسین طعنه،
حقیقت اهلی یم دونیادا دوزگون بیر شعاریم وار.

بهشتی اونلارا وئردیم یاخامدان ال گوتورسونلر،
منیم دونیا ائوینده گولشنیم وار، لاله زاریم وار.

اولار گئتسین اوتورسون مسكن ائت سین عرشی اعلانی،
منیم باغ و چمنده ن ده گوزه ل دیلبر، دیاریم وار.

اونون فكرینده بیر عالم گزیر اوندا حقیقت یوخ،
منیم فكریم جماعت دیر اولاردان انتظاریم وار.

اولار ایسته ر گوزو باغلی بشر قالسین جهالتده،
منیمده نوعیمی قورتارماغا چوخ اعتباریم وار.

گئدیب عقبا ائوینده عیش و عشرت ایله سین زاهد،
منیمده هانسی عالمده دولانسام اختیاریم وار.

گئچیب دیر عومرو ذاكر بیرده موهوماته آلدانماز،
مرامیمدان گوتورمم ال اونا چوخ اعتباریم وار.

این نوشته در ابراهیم ذاکر اردبيلى ارسال شده است. افزودن پیوند یکتا به علاقه‌مندی‌ها.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *