نئجه کی، اؤلکه یه زینت وئرر بؤیوک سردار

ترجمه سی “م. مبارز” داندی

چمن بزندی چیچکله گلینجه فصل باهار،
خزان غمیندن آغاجلاردا قالمادی آثار.
طلسمی باطل اولوب شاختانین، دوشوب تختدن،
گتیردی یوخسا خزانی یامان گؤزه روزگار.
نقاب حاضرلادی دوران الی قیزیل گول دن،
نهان قیلدی کدر اول نقابده رخسار.
آغاج آخار سویا تؤکدو گوموش کیمی چیچیی،
آخار سو سائل، آغاج ایسه اولدی ثروتدار.
هدیقه مصرینه گول یوسفی روان اولدی،
چمن طوافینه گلدی بولود قطار قطار.
قالیرسا گوزگوده پاسدان کدورتین اثری،
جاهاندا قالمادی غمدن بیر عز، اولونجا باهار.
هوا گتیردی ایشه، سحرینین کمالی ایله،
جاهانی زمروده غرق ائیله دی یاشیللیقلار.
چکر گول اوزلولری گلشنه کؤنول عشقی
کی، سرو میل ائدر سروه، دلبره دلدار.
گلون لطافتی ایله بزندی صحن چمن،
نئجه کی، اؤلکه یه زینت وئرر بؤیوک سردار.
عدالتین گولو، دین باغی نین باهار چیچیی،
تاپار وجودو ایله مملکت نظام و قرار.
محیط عدلی احاطه ائدن محمد بئی،
سنین کرم دنیزینده نه حد، نه ساحل وار.
زمانه قالیب اراده ندن ایستییر یاردیم،
یئنیلمز عزمین اولوب حل مشکلاته آچار.
اونون محبتی هر جور بلایه مانع دیر،
سخاسی حادثه نی ائتدی دورماغا وادار.
اونون صداقتی هر کلّی، جزعی حاوی دیر،
حمایه سینده اونون خاص وعام شن یاشایار.
گونش کیمی بوتون آفاقی نوره غرق ائتدین،
وجودون ایله یاییلدی یئره، گؤیه انوار.
دیریلدی معرفتینله شریعت احکامی،
هجومون ایله سنین اؤلدو زمرۀ اشرار.
نجات تاپدی سنین لطفون ایله هر عالم،
مدام قهرین ائدیب جاهیلی بلایه دچار.
همیشه دوشمنینه فیض راحت اولدی حرام،
سنین یولونلا گئدن لر اولوب سعادته یار.
اطاعتیندن او کس کی، بویون قاچیردی سنین،
جزا وئرر اونا قهرایله خالق قهار.
عدالتیندن اولار بهره مند او کس لر کی،
خیرلی ایشلرایله عدلینه ائدر اقرار.
وجودون اؤلکه یه، ای سروریم، غنیمت دیر
کی، عادل حاکمی لطف الهی سایمیشلار.
شها، یازیق بو فضولینی آستانیندا
اونوتما، لطف ایله اول حالینه اؤزون غمخوار.
یانیندا اولماسا دا، اولسا دا او، دوستون دور،
یامان دا، یاخشی دا اولسا، قولون دور، ائیله مه خوار.
بئله امید ائدیرم کی، نه قدر چرخ فلک،
بو ثابت عالمین اطرافینا دؤنوب دولانار،
سعادتین ابدی اولسون آستانیندا،
اوستوندن سایه نی کم گؤرمه سین فضولی زار.

این نوشته در مولانا محمد فضولی ٠۲ -قصیده - فارسجا ارسال شده است. افزودن پیوند یکتا به علاقه‌مندی‌ها.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *