بیز وفا گؤزلردیک، اونلاردان یئتیشدی یوز جفا

ترجمه سی “م. مبارز” داندی

بو وفا سیز دهرده بیز درده اولدیق مبتلا،
درده عادت ائتمیشیک، آختارماریق هرگز دوا.
کؤنلومیز درده توتولدو، بیر طبیبه آچمادیق،
سیلدیک هر بیر نسخه دن گؤردوکده وار خط شفا.
تاپمادیق بیر عز وفادن روزگار اهلینده بیز،
بیز وفا گؤزلردیک، اونلاردان یئتیشدی یوز جفا،
خلقدن قاچدیق جاهاندا، قیلمادیق یاد اؤزگه نی،
اولمادیق جان ایله ده تکلیک ائوینده آشنا.
بیز همین انسانلاریق کی، گردشیله چرخ دون.
تفرقه سالمیش آرایه، مین جفا گؤرموش روا.
گؤز یاشی جاری ائدیب مژگانیمیزدان سئل کیمی،
شام کیمی کسدیک دلی کیم، گیزلی قالسین ماجرا.
بیز پریشانلار سو اوستونده حبابه اوخشاریق،
هئچ زامان بیرلشمعی دوران بیزه گؤرمز روا.
حادثه طوفانی دایم دؤندرر ویرانه یه،
هر یئرینده عالمین مین بینوا تیکسک بینا.
بیز فلک دورونده آختاردیق وفا رسمی، ولی،
هر زامان اول آینه گؤستردی عکس مدعا،
چوخ دولاندیق دورونه بو عالمین پرگار تک،
باشیمیز دوشدی آیاغه، اولمادیق شأنی اوجا.
چوخ تردد ائئله دیک، عالمده هرگز تاپمادیق
بیر مقامدان غیری کیم، هر شئیده اولدیر ابتدا،
قطره لر تک یئر اوزوندن آیریلیب خیلی زامان،
میل قیلدیق، یوکسلیب بیزده ائدک سیر هوا،
عالم علویتین سیرینه اوّل اوز قویوب،
ائتدیک آخرده اؤز آلچاق طبعیمیزه اقتدا.
بیز بو وارلیق گوزگوسونده اوخشاریق بیر عکسه کیم،
بیلمه دن اؤز عیبینی، انساندا نقصان آختارا.
نه یارانماق، نه فسادین سرّینی درک ائتمیشیک،
نه فنا دردیندییک، نه ائیلریک فکر بقا.
ذات کاملچون بقا کیفیتیدیر بیر دلیل،
ذاتیمیز هاردان ائدر بؤیله مقاما اقتضا؟
یوخدور عالمده فنانین شرطی وارلیقدان سوای،
بیزده اول وارلیق هانی کیم، یوخلوغا قابل اولا؟
یئتمییر خلقین قولاغینا دلیمدن نئیلییم،
بیر صدا کیم، خلقی شنلندیرسین، اولسون جانفزا.
منده اؤیله قلب ده یوخدور کی، دردی درک ائدیب،
ذوق آلیم، خوشحال اولوم درد اهلی ائتدیکجه نوا.
کفردن دیر کیم، بو معنا سیز وجودیم بت کیمی،
بیر بزک اولموش ریا بتخانه سینه دایما.
طعن ائدر عالم منه، من اؤز اؤزومدن غافلم،
قلبیمین سرّینی حیرتدن ائده بیلمم ادا.
اؤز سرانجامینلا، خلقین طعنینین تدبیرینی
کیم منی خلق ائیله میشسه بؤیله تاپشیردیم اونا.
اود ووروب یاخدیم لباس اعتباری بوسبوتون،
اولمادی چرخین الیندن دامنیم هرگز رها.
بیر کلف تک یوز دوگون سالمیش ایشیمده روزگار،
عاجزم مشکلّرین حلینده، یوخ مشگل گوشا.
بیرجه امیدیم اونا قالمیش کی، صبحون فجری تک،
حل ائده بو مشکلو مهریله شاه لافتا.
بؤیله بیر سلطان کی، یوز ایل کئچسه ده بیر غنچه نین
ائتمه دن یاد آدینی، آسان آچا بیلمز صبا.
اؤیله بیر سلطان کی، ایزنی اولمادان آچماز فلک
پرده صبحون چهره سیندن، نوره غرق اولماز فضا.
اؤیله سلطان کی، کرم گول شاخه سی فقر اهلینه،
هر نفسده یوز توکنمز نعمت ائتمیش دیر عطا.
التفاتیله گئیینمیش فقر ثروت پالتاری،
بیر باخیشلا وئردی گوهر قیمتی ساده داشا.
حق ولی سیدیر، ولایت تختی نین شاهنشهی،
دین سلطانی، امام حق، شاه اولیا.
کفردن آیریلدی شرع مصطفی، باعث اودور،
احمد مختار اونونلا اولدی فخر انبیا.
ذات پاکیله صدف گوهرله دولدو کعبه ده،
توربه سی فیضیندن اولموش یئر اوزو فخر سما.
بیر دلیل دیر حرمتینه کیم، شبی معراجده،
گؤردو احمد کیم، علی دیر ساکن اشر خدا.
اهل بیتی لاله زاریندن نمونه ایسته سن،
گؤر نئجه الوان اولوب قان ایله دشت کربلا.
قبری نین فیضیله قوملاری نجف صحراسی نین
قیمته مینمیش، اولوب خالقین گؤزونده توتیا.
بیر سعادت منبعی کیم، آسمان فیضی دن
مرحمت خورشیدی سالسا عالمه ذره ضیا،
اول ضیایه سایه سالماق دیر فلاکتدن نشان،
اولسا بو سایه سالان عالمده حتی بیر هما.
کعبۀ درگاهی اول شاهین بیر حاجتگاه دیر،
حاجت ایچون کیمسه یه لازم دئیل اوردا دعا.
ای اولان درگاه حاجت کعبه سی انسانلارا،
خلقه حاجت کعبه سی یوخدور او درگه دن سوا.
هانسی بیر حکمت کی، گیزلنمیش حجاب غیبیده،
رأیین ایله چیخمیش اول حکمت عیانه مطلقا.
گر قضا قلبینده بیر ایش باغلاسا مین ایل دوگون،
رأی وئرسه اول ایشه مین دفعه تقدیر قضا،
اول ایشین انجامینه امکان تاپیلماز دهرده،
گر قضا تقدیرینه اولمازسا رأییندن رضا.
خلقتیندن آدمین مقصد اطاعت دیر، فقط
یوخدور حق امرینه تابع لیک دن اؤزگه مدعا.
هر قدر کی، رهنمالیق ائتمه میشدین آدمه،
باش وئرردی طاعتینده آدمین هر گون خطا.
ایندی چوخدان دیر نجفده اقتدا ائتمیش سنه،
طاعتینده هر خطا کیم وار ایدی، قیلمیش قضا.
چیخدی مشریک لیک پاسیندان شرع حق آینه سی،
وئردی اول آینه یه هر آینه تیغین جلا.
دینه تابع دیر او کس کیم، تابع اولموش حکمونه،
کفردور اولماق سنین فرمانینا بیعتینا.
هانسی بیر کس کی، چکر دنیا ایله عقبا غمی،
سؤزده سلطان اولسا دا، سن بیل حقیقتده گدا.
هر ایکی عالمده چون حس ائیله مزسن احتیاج،
سندن اؤزگه پادشه یوخدور ایکی عالم آرا.
هانسی اوردو قارشی سیندا گئتسه سن تک بیر امام،
سایه تک ایزلر اونی هر لحظه نوستر مطلقا.
هانسی بایراق سایه سینده اولسا سن تک پاک نور،
آیلا گون سجده قیلار، تسلیم اولار اول بایراغا.
هر کیمین واردیر، الینده مهری نین سر رشته سی،
هئچ ندن خوف ائیله مز، دشمنله دنیا دولسادا.
تکجه سنسن هر یئره گئتسک پناهی بیزلرین.
سندن اؤزگه یوخ پناهیم، یا علیل مرتضی .
سندن اؤزگه بیر کسه بیزلرده اولماز اعتماد،
سندن اؤزگه کیمسه یه اوز توتماریق بیز بینوا.
وئرمیشیک مهرین کیمی یاخشی عملده امتحان،
جمله اهل جنّتیک، حق عدلیله وئرسه جزا.
بخش ائدرسه بیزلره امید اؤز اعمالیمیز،
باعث اولدیر، سؤیکریک آرخا سنین درگاهینا.
آستانین توربه سینه میل ائدن رخساریمیز
بیر سامان دیر کیم، اونی جزب ائیله میش دیر کهربا.
درگهین تورپاغینه دوشدی سارالمیش چهره میز،
یعنی اول قیمتلی تورپاغه نثار ائتدیک طلا.
خدمتینده بیز سنین تام بیر عؤمور صرف ائتمیشیک،
یاخشی اولماز ائیله سک بو خدمت ایله اکتفا.
بیر بوکولموش قامت ایله ناتوان بو جسمی بیز،
لایق اولسایدی ائدردیک درگهینده بوریا.
درگاهینده بو ایکی قات قددیمیزدن طاق وروب،
گؤز کسیب دوست دان، اونا بیگانه اولموش اقربا.
بو فضولی کیمسه سیزدیر، چاره سیزدیر، یا علی،
گؤز کسیب دوست دان، اونا بیگانه اولموش اقربا.
مختلف بیر خلق ایچینده دوغرو یولدان آزمامیش،
سانکی خط استوا دیر، میل قیلماز ساغ سولا.
چاتمیش آرتیق اول زامان کیم، نایل اولسون لطفونه،
بو بلادن اول علیل دردمند اولسون رها.
طوطی شکّر شکن دیر، وصفینی ورد ائیله میش،
ایستمز اوصافینی زاغ و زغن ائتسین ادا.
انس باغی، قدس گلزارینده بیر بلبل دور او،
دار قفس کنجونده لایقدیرمی کی، محبوس اولا؟
بیر نئچه فرعون مکرین رشته سینی سحرایله،
بسدیر ائتمیش لر اونون ساده گؤزونده اژدها.
آستانیندن ید بیضا چیخارماق واختیدیر،
یا علی، ساحرلرین میدانینه آت بیر عصا.
اعتقاد ائتمزلر اعجازینه موسی نین، ولی
جمله سی جؤنگه پرست اولموش بو قوم بی حیا.
دم او دم دیر کی، قیریب چاتماق ایچون کافرلری،
ذوالفقار الده ائدیدین، یا علی، عزم غزا.
دین یولوندا عادتین اوزره بیزه معلوم دیر
کیم، ائدیب دیر حسن سعی ین حقی باطل دن جدا.
طبعیمین طوطی سی دل آچمیش فصاحتله منیم،
حسن گلزاریندا کامیمجا ائدر شور و نوا.
ایسترم وصف ائیله ییم آنجاق علی اولادینی،
ائتمییم بیگانه بیر شخصی توقع له ثنا.
توبه قیلدیق عمرموزده کیمسنی مدح ائتمیک،
بیر علی، بیرده اونون اولاد پاکیندن سوا.

این نوشته در مولانا محمد فضولی ٠۲ -قصیده - فارسجا ارسال شده است. افزودن پیوند یکتا به علاقه‌مندی‌ها.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *