چرخی اینجیتمک دن حاصل یوخ اذیتدن سوای

ترجمه سی “م. مبارز” داندی

گؤزده رخسارین دورور، کؤنلومده مهرین هر قدر،
کؤنلوم اولموش هم اسیری، گؤزلریم قان یاش تؤکر.
کؤنلومین آل قانینا، گؤز یاشیما باخ، بیل منیم
گؤزده بیر باشقا غمیم، کؤنلومده وار باشقا کدر.
یاندیریب خاکستره دؤندردی غم لر جسمیمی،
معرفت اهلی گلومدن گؤزلره سورمه چکر.
عیش اودوندان بیر اثر واردیر کؤنولده مطلقا،
سورمه اولدیقدا کولوم گؤزلرده پارلار بو اثر.
حاصلیم حسنون تمناسیندا اولموش ای پری،
کیرپیگیمین هر اوجوندا قطرۀ خون جگر.
قلب اودوندان بیر شرردیرمی جگر قانیم منیم
بونجا شمعی یاندیریب یان یانه دوزموش اول شرر.
یوز قاپی آچمیش سینه مده اوخ کیمی کیرپیک لرین،
تا گؤرونسون هاردا ساکن دیر بو قلب دربدر.
یاغدیریر هردم فلک باغرینا طبعین آه اوخو،
علت اولدیر کیم، فلکدن ائیله ییر، جانیم حذر.
چرخی اینجیتمک دن حاصل یوخ اذیتدن سوای،
شیشه نی قیرسان اولار هر پاره سی بیر نیشتر.
کیمسه باخمازمی سامان رنگی آلان رخساریما،
دوشدی خاک پاینه اولدی قیزیل تک معتبر.
کیمیاگر آستانیمدان گرک دیر درس آلا،
چون ساماندان صاف غزل حاضرلاماق دیر بیر هنر.
من ملامت بزمی نین بیر شمعییم، فرق ائیله مز،
یا منی یاندیر و یا کس باشیمی ای سیمبر.
شیوی عشقی گرک اؤیرنسین عاشق شمعدن،
باده گئتدیکده باشی دیرچلسین، اولسون خون جگر.
حیف کیم، بیر لحظه کؤنلوم غمدن آزاد اولمادی،
ایزله دی بو کهنه دنیادا اونی مین فتنه، شر.
کوتله شیب آرتیق قیلینج تک دوغرایان کسکین دلیم،
طعن اوخونا بی هنرلر جسمیمی ائتمیش سپر.
گؤز یاشیمین گوهرینه یوخدور آرتیق مشتری،
توپلانیب قالمیش ببک لرده او قیمتلی گؤهر.
قورخدان گؤز یومموشام دیدارینا دلبرلرین،
هر پری آردینجا بو دنیادا یوز شیطان گزر.
قویماییرلار اهل ذوق و کامه چاتسین دهرده،
بو عناد اهلی منه هر آندا وئرمیش مین ضرر.
یأس وادیسینده کام دل تمنا ائیله مه،
بو شورانلیق چؤلده امید آغاجی وئرمز ثمر.
یار یوخوم دور کی، اونا اغیار ظلموندن دئییم،
قالمیشام ناچار ائدیم بو اؤلکه دن میل سفر.
قلبیمین سرّینی، شرح حالیمی عرض ائتمه یه،
اعتبارلی دوست چوخ گزدیم، تاپیلماز بیر نفر.
جمله سی کوردور، پریشان حالیمی کیم لر گؤرر،
جمله سی کاردیر منیم فریادیمی کیم دینله یر؟
تکجه او، حشمت لی سروردیر کی، ثابت رأیله،
پاک قلبیله اولوبدور بیر گونش تک جلوه گر.
لطف و احسان و سخاوتده ائله شهرت تاپیب،
کیمسه بیلمز کیم، ملک دیر، یوخسا اولاد بشر.
جلوه ساچمیش، فیض وئرمیش عالمه لطفی اونون،
طبعی نین قوت قوشو آچمیش بوتون دنیاده پر.
عبدالرحمان کی، فلک شوکت، ملک قدرتلیدیر،
درگهینی سجده گاه ائتمیش اونون شمس و قمر.
سایۀ لطفونده شعرین آرتدی قدر و قیمتی،
شعر قدرینی نئجه زر قدرینی زرگر بیلر.
مرکز ادراکده بیر قطبسن، ای سروریم،
غرق اولار نوره کیمه لطفیله سالسان بیر نظر.
بختین امدادیله شهپر آچسا ادراکین قوشو،
خدمتینه، سروریم، چرخ فلک باغلار کمر.
بو فضولی درگهین خادم لریندن دیر سنین،
حال زاریندان اونون، لطف ایله، اولما بی خبر،
عهد قیلمیشدی کی، واردیر هر قدر جسمینده جان،
قارشینا سؤز سفره سی آچسین اؤز امکانی قدر.
مقصدیم کؤنلوم دکی درده تسلی دیر منیم،
یوخسا وئرمزدیم سنه بو سؤزلریمله درد سر.
ایسترم کی، هر قدر دور فلک خدمتچی سی،
هر گئجه مجلس دوزلدیب یاندیررا شام و سحر.
هئچ زامان باغلانماسین احسان یولون بو دهرده،
من و یوز من کیمی یولچو اولسون اوندان بهره ور.

این نوشته در مولانا محمد فضولی ٠۲ -قصیده - فارسجا ارسال شده است. افزودن پیوند یکتا به علاقه‌مندی‌ها.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *