خوار و زار عالم اولدوم

عؤمورلر خون دیل ایچدیم،
گولعذاریم، سندن اؤترو
آخیری داغلارا دوشدوم،
لاله زاریم سندن اؤترو.

سینه می اوخلار دلیبدیر،
قانلی پئیکانلار قالیبدیر،
جانیمی غم لر آلیبدیر،
غمگوساریم، سندن اؤترو.

عاشیق اولان کئچر ائلدن،
باش و جاندان، خانماندان،
دامه نین تک گئتدی الدن،
ایختیاریم، سن دن اؤترو.

گؤزلریم قانیله دولدو،
بیلمنم کؤنلومه نولدو،
کاکیلین تک قاره اولدو،
روزیگاریم، سندن اؤترو.

قؤوسی ایله همدم اولدوم،
همدم درد و غم اولدوم،
خوار و زار عالم اولدوم،
نازلی یاریم، سندن اؤترو.

این نوشته در قوسی تبریزی 02- گرایلی لار ارسال شده است. افزودن پیوند یکتا به علاقه‌مندی‌ها.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *