ایچه لیم بیر نئچه گون باده و سرشار اولالیم!

گلین ای اهل وَرَه عاشیق و خمار اولالیم!
هامی بیر موغبجه یانیندا گرفتار اولالیم!
هئی کیمی ناله چکیب، چنگ کیمی زار اولالیم!
نئجه بیر بؤیله گؤزل فصلیده هوشیار اولالیم!
ایچه لیم بیر نئچه گون باده و سرشار اولالیم!
بیزه یار اولماسا ساقی، بیز اونا یار اولالیم!

جامی لر زهریله مملو شب هیجران ایچدیک،
ائیله دیک توبه اگر گؤز-گؤزه، پونهان ایچدیک،
هر نه کیم وئردی بیزه ساقی دؤوران ایچدیک،
بو فنا دهرده بسدیر بو قدر قان ایچدیک!
ایچه لیم بیر نئچه گون باده و سرشار اولالیم!
بیزه یار اولماسا ساقی، بیز اونا یار اولالیم!

نئجه بیر شام و سحر خواب و خیال ایله کئچه،
نئجه بیر اختر مسعود زوال ایله کئچه،
یوز نشاط ایله گلیب عؤمر، ملال ایله کئچه،
حیف دیر بیله باهار آیی بو حال ایله کئچه،
ایچه لیم بیر نئچه گون باده و سرشار اولالیم!
بیزه یار اولماسا ساقی، بیز اونا یار اولالیم!

خوبلار واری چمن سئیرینه زینهار گلین،
جمع اولون غنچه کیمی، گول کیمی بیر دم آچیلین،
ائشیدین بولبولون آهنگینی، قدرینی بیلین،
دوستلار، موسیم گول گئتمه دن الدن ییغیلین:
ایچه لیم بیر نئچه گون باده و سرشار اولالیم!
بیزه یار اولماسا ساقی، بیز اونا یار اولالیم!

یاره جان ائیله ریک ایثار بودور نیتیمیز،
توتاریق دامنینی یار اولا گر دؤولتیمیز،
بیز اونون بنده سی ییک، سجده سی دیر طاعتیمیز،
عؤمر اگر مهلتیمیز وئرسه، فلک فرصتیمیز،
ایچه لیم بیر نئچه گون باده و سرشار اولالیم!
بیزه یار اولماسا ساقی، بیز اونا یار اولالیم!

فارغ اولمان فلک مبرمین ابرامیندان،
هیچ کیم سعی ایله قورتولماز اونون دامیندان،
دوستلار، دور زامان گردش ایامیندان،
ائتمه میشکن بیزی بیهوش اجل جامیندان:
ایچه لیم بیر نئچه گون باده و سرشار اولالیم!
بیزه یار اولماسا ساقی، بیز اونا یار اولالیم!

نولا گر چرخ ایله یکرو قیلیرام من قؤوسی!
دوست گر یار اولا نئی لر منه دوشمن، قؤوسی،
بوتیلن خلوت ائدن یئرده بیرهمن قؤوسی!
گل کی، بیر گوشه ده ساقی و من و سن قؤوسی؛
ایچه لیم بیر نئچه گون باده و سرشار اولالیم!
بیزه یار اولماسا ساقی، بیز اونا یار اولالیم!

این نوشته در قوسی تبریزی 04- مسدس ارسال شده است. افزودن پیوند یکتا به علاقه‌مندی‌ها.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *