په-په بو نه صحرا، بو نه فردوس برین دیر

ایام باهار اولدو فغان باشلادی بولبول،
بیر نؤو کی، گولبانگینه مهو اولدو اونون گول.
غم کشوری کؤنلوم کیمی زیرو-زبر اولموش،
تا اولدو طرب لشکرینه سبزه قاراوول.
گر ابر کرم بئله یاغار سبزه لر اوسته،
سئیلابه گئدر خار و خس و صبر و تحمل.
مینا کیمی قالدیردی الم شاخ گول، آمما،
قلبینه سالیر توبه نین اول رنگ تزلزول –
کیم، نالۀ مستانی مطرب اثرین دن،
یوز یئردن ائدر غنچۀ سیراب قدح گول.
بیر بئله باهار آیی کی، هنگام طرب دیر
ساقی، دولانیم باشینه، هئی بهر تغافول،
سن بادۀ گولرنگ یئتیر تا خبریم وار –
کیم، هوش آپاریر کاکیل مشگین کیمی کاکیل:
په-په بو نه باغ و بو نه گولشن، بو نه گول دور –
کیم، شبنمی گؤز، غنچۀ سیرابی کؤنول دور.

صهبا قیزاریر گول کیمی سونبوللره قارشی،
سونبول گؤگریر سبزه کیمی گوللره قارشی.
ایثار اوچون آچمیش گرهین غنچۀ پور زر –
کیم، عرض تجمل قیلا بولبوللره قارشی.
رشک آتشی داغ ائتدی منی، لاله صفت کیم،
نرگس نئچین آچمیش گؤزونو یوللارا قارشی.
اول گول منی گر غنچه کیمی سالماسا دیلدن،
گؤرمک گرک آهنگیمی بولبوللره قارشی.
مئیخانه یولون باشلادیلار، ائل ساناسان کیم،
پرواز قیلیرلار سونالار گؤللره قارشی.
ساقی، دولانیم باشینا ای شوخ سیتمگر،
گؤر عجز و نیازیم بو تغافوللره قارشی.
دور، لاله کیمی قویمایا گؤر الدن ایاغی –
کیم، ای گؤرونور ساغر مئی گوللره قارشی:
په-په بو نه باغ و بو نه گولشن، بو نه گول دور –
کیم، خاری اونون گول، خس و خاکی چمن دور.

ای حوسنو فیرنگی، عربی خاللاری هیندو،
رفتاری دیل آزار، اوزو نازیک، قدی دیلجو.
یارب، بو نه ناوک، بو نه مژگان رسا دیر.
وه بو نه کامان دیر، بو نه ابرو، بو نه بازو؟
سرگشته قیلیب دیر منی اول دستۀ کاکیل،
گردابه سالیب دیر منی اول حلقۀ گیسو.
مجنون ایله فرهاد منیم گیردیمه یئتمز.
ای لبلری شیرین، سؤزو لعلی، گؤزو آهو.
اول چشم سیه مست منیم عقلیم آپاردی،
معذورم اگر ائیله میشم گم ایله یکرو.
هرچند کی، جام مئی و گول هوشروبا دیر،
ساقی، دولانیم باشینا ای گؤزلری جادو،
اما، نئچه احوالیمی سندن یاشیریم کیم،
دیوانه ائدیب دیر منی اول نرگس جادو.
په-په بو نه ساحیر، بو نه نرگس، بو نه گؤزدور –
کیم، هر موژه سی بیر دیل و نظاره سی سؤزدور.

یارب، نولا گر دردیمی جانانه دئسینلر،
احوالیمی اول زولف پریشانه دئسینلر.
سرگشتلیگین وصفینی بو مور ضعیفین،
ارباب کرم نولا «سلیمان»-ه دئسینلر.
او لیلی یه قوربان اولورام من ته دیلدن،
قوی بیر نئچه بی ته منه دیوانه دئسینلر،
پروانه لر اؤیرندی دؤنوب یانماغی مندن،
راضی دئییلم کیم، منه پروانه دئسینلر.
اونلار کی، دئییرلر بو نه فریاد و فغان دیر،
باری بو سؤزو اول گول خندانه دئسینلر.
ساقی، دولانیم باشینا ای حوصله دوشمن –
تا ائل سنه گنج و منه ویرانه دئسینلر.
هر یئرده اولا توت مئی و قوی زاهید و واعظ:
دئیر و حرم و مسجید و مئیخانه دئسینلر.
په-په بو نه محفیل، بو نه مئیخانه، نه مئی دیر –
کیم، عابدی مطرب دیر اونون، واعظی نئی دیر.

گولزاریده یوز مین دیل ایله بولبول خوشخوان،
تکرار قیلیر مودهت نواب زامان خوان.
گنجور هنردیر، خرد و مخزن دانش.
دریای کرم، بحر سخا، منبع احسان.
خولق حَسَنی بزم گونو ابر گوهربار.
مؤوج غضبی رزم گونو آتش سوزان.
وصفین دن اونون سؤیله دیم آمما دیله دیم کیم،
تا دایر اولا دایرۀ عالم امکان،
اؤز ایستدیگینجه اولا اول عرش جنابین،
سئیر فلک و دؤور زامان، گردش دؤوران.
هرچند تونوک حوصله و مست خرابم،
ساقی، دولانیم باشینا ای سرو خورامان،
اؤز باشین اوچون دور بیر آیاغ ایله الیم توت –
کیم، الدن آپاردی منی اول مرغ خوش الحان:
په-په بو نه بولبول، بو نه افغان، نه نوا دیر –
کیم شدّی دوبالا دیر اونون، مدّی رسا دیر؟

ای کیم، اوتانیر چرخ سنین شأنینی گؤرگج،
کیوان اَییلَیر رفعت ایوانینی گؤرگج.
گر تؤوسن گردون سبک سئیر یئگین دیر،
حیرتده قالیر ساحت میدانینی گؤرجک.
گیزلنسه اگر بحر حباب ایچره روا دیر،
دریای موحیط گر کف احسانینی گؤرگج.
اود توتسا صبا گرد رهیندن عجب اولماز –
کیم، برق اَریر آتش جؤولانینی گؤرگج.
کیم دیر کی، مئی و ساقی و صهبا هوس ائتمز،
عیش و طرب و بزمینی، دؤورانینی گؤرگج.
ساقی، دولانیم باشینا ای مست گوذاره،
هرچند اؤترسن من نالانینی گؤرگج.
اما منی گؤر کیم، نه قدر گئتسه آیاغیم،
الدن گئده رم سرو خورامانینی گؤرگج:
په-په نه گؤزل سرو روان دیر، بو نه قددیر –
کیم، سایه سی شان دیر، ثمری عؤمر ابددیر.

هرچند سیه مست دیر اول نرگس شهلا،
کسمز نظرین قؤوسی کم ظرفدن آمما،
آیینۀ سیرابین آچار حوسن نیقابین،
گر تشنۀ عشق آب حیات ائتسه تمنا،
فریاد کی، بیر وادییه دوشموش گوذریم کیم،
شورین دن اونون غنچه لنیر قطرۀ دریا.
یارب، بو نه عالم، نه ترشح، نه هوا دیر،
بیلمم بو نه محفیل، بو نه مئی دیر، بو نه مینا؟
یوز شوکر کیم، ائتمیش نظر ساقی کؤوسر،
توفیق میسر بیزه اسباب مهیا،
بیر یار و کباب و، مئی گولگون و من و سن،
ساقی، دولانیم باشینا ای آهوی رعنا!
بیر بئله گؤزل فصل کی، لبریز چونون دور،
گل باشین اوچون، گل توتالیم دامن صحرا:
په-په بو نه صحرا، بو نه فردوس برین دیر –
کیم، آوی بشر، آوچولاری آهوی چین دیر؟

این نوشته در قوسی تبریزی 06- ترکیببند ارسال شده است. افزودن پیوند یکتا به علاقه‌مندی‌ها.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *