کویینده سرفراز اولوبدور رقیب لر

زیندان غمده اولدو گونوم غارت آغلارام،
سودای عشقینده چکیب ذلت آغلارام.

زلفون هاواسی ایله اولوب تیره تر گونوم،
قال و بلادا هجرین اولوب قسمت، آغلارام.

آهیمله دؤور شمس و قمر هاله باغلاییب،
بیر دم سنله ائیله مه دیم صحبت، آغلارام.

بولبول کیمی نوایه گلیب ائیله رم فغان،
هجر روخونده اولدو کمان قامت، آغلارام.

آه و فغانیم عرشه چیخیب، دلبرا، نه ائدیم؟
سنسیز منی احاطه ائدیب محنت، آغلارام.

کویینده سرفراز اولوبدور رقیب لر،
ائدیرلر هر زامان منه مین تهمت، آغلارام.

انجوم شمار اولوبدو فراقینده گؤزلریم،
یاد وصالینیله چکیب حسرت، آغلارام.

نواب تک آلیبدی الیمدن توانیمی،
بی طاقت ائیله ییبدی منی فرقت، آغلارام.

این نوشته در میر محسن نواب ٠١- غزللر ارسال شده است. افزودن پیوند یکتا به علاقه‌مندی‌ها.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *