ال چکیب نواب دان، یارب، او یار بیوفا

بیر نگار نوباهارین گول جمالین ایسترم،
لؤلؤی تر تک جامالی اوزره خالین ایسترم،
جویبار حوسن آرا، شکّر زولالین ایسترم،
مئی ایچیب مستان گزن چشم غزالین ایسترم.

عاشیقین ترک ائیله ییب، اما اؤزو مستان گزر،
ناز ائدر هر دم رقیبه باغ آرا شادان گزر،
یادینا بیلمره دوشمز، عهدیله پیمان گزر،
بیر بئله انصافسیز یارین وصالین ایسترم.

یارینی حسرت قویوب عالم آرا خار ایله ین،
سیندیریب اقرارینی فرقتده بیمار ایله ین،
شاد ائدن اغیارینی هر لحظه تکرار ایله ین،
گردن مینا، قدد طوبا مثالین ایسترم.

روضۀ حوسن ایچره گویا آهوی تاتاردیر،
خال میشکینی زنخدانیندا عنبرباردیر،
لبلری گول، دیشلری هم لؤلؤی شهواردیر،
بیر بئله رعنا غزالین، خط و خالین ایسترم.

بولبول شوریده تک جه-جه ووران، داد ائیله ین،
مست اولان، طاووس تک مستان گئییب، مستان گزن،
عاشیقینی گؤرجگین ترلان کیمی گردن چکن،
ناز ائدن نازیک بدن طوطی مقالین ایسترم.

باغ گولزار ایچره آهو کیمی هر یانه باخان،
اعتنالار ائیله ییب اغیاره ناز ایله باخان،
عاشیق زارین دیلینی نار هجرانه یاخان،
درگاه پاکینده اغیارین زوالین ایسترم.

ال چکیب نواب دان، یارب، او یار بیوفا،
نازیلن ائیلر اونا هر لحظه مین جور و جفا،
بیر دئمز بیچاره مندن گؤرمه دی ذوق و صفا،
رم یئین، رام اولمایان وحشی غزالین ایسترم.

این نوشته در میر محسن نواب ٠٢- مربع لر ارسال شده است. افزودن پیوند یکتا به علاقه‌مندی‌ها.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *