محبت اهلی، ناصح طعنۀ اغیاردان قاچماز

گؤزون قربانی، آه ائتمه، غم هجرانه صبر ائیله،
اگر کؤنلون دؤنه هجران الیندن قانه، صبر ائیله،
غم عشق ائیله ییبدیر چوخلارین دیوانه، صبرائیله،
محبت اهلی سن، یان آتش سوزانه، صبر ائیله.

قرار ائت، گؤزلرین آب وصال ایله پرآب ائتمه،
مکدّر خاطر اولما، آغلاما قلبین کاباب ائتمه،
یئترسن عاقبت مقصوده، بونجا اضطراب ائتمه،
اولار کامینجا آخر، گردش دورانه صبر ائیله.

محبت عالمینده عاشیقه دایم وصال اولماز،
بو یولدا عاشق بیچاره هرگز بی ملال اولماز،
فراقه دوشمه ینجه وصل دلداره ماجال اولماز،
سیتم لر چکمه یه معتاد اولوب مردانه صبر ائیله.

گؤزوم، اهل وفالار یارین هجرانیندان اینجیمز،
اگر مین نیشه وورسا نوک مژگانیندان اینجیمز،
غم فرقتله جانین وئرسه جانیندان اینجیمز،
بلای عشقی چک، بو درد بیدرمانه صبر ائیله.

داغیتما عارض نسرینه اول زلف موطرانی،
در افشان ائیله مه، آغلاتما بونجا چشم شهلانی،
او شهلا چشمینه اولسون فدا مین نرگسین جانی،
گلیر، البته، بیر گون درد و غم پاینه، صبر ائیله.

محبت اهلی، ناصح طعنۀ اغیاردان قاچماز،
خطالار گلسه گولدن بولبوله گلزاردان قاچماز،
یانار هجران ایله پروانه لر تک، ناردان قاچماز،
وفا گؤستر، نثار ائت جانینا جانانه، صبر ائیله!

این نوشته در آغا علی بی ناصح ٠٢- مربع ارسال شده است. افزودن پیوند یکتا به علاقه‌مندی‌ها.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *